Ro bepon yanggangginem be Suri au baime, bepon yakofn kasumasa be Mansren Allah ro nanggi snar saswar ma babe nabye byedya faro ko isof ro fafisu epyum ine kofarsrou monda kukr wos kobena ro kaset ine imfasa wakrower fafyare erobaido wos inggobena imfa nakfamfon fawawi be bero sup bondi na. Rya dine, kawasa kanggram erobaido kina besiper bero sup Byaki nsine eser eser sya sakrower farkarkor be bero sup Inggris i ri yi. Isoine wos Byak. Inja sinan sinan bero sup Byaki nggoya nggangginem faro roma anauya ma faro roma manggun mamfawinanem bena sup Byaki mgoine insamaido mgosambrab fa mgofaduru ma mgofarkor wos kobanine faro roma mgun ma inai mgun bebabo sinempon imbude romawa ma kpu kpu kobe ero ras nayama nsya sakfawi wos Byak anine ba ri. Imbo sefarander i eroba ido sepro i. Rarirya nido nari sawos ker be amber. Inja swaf ine be barpon beri kananun wos Byak ine faro si. Insama ido siswarepen i. Imbo eroba ido nari wos Byak kobanine ryo eroba ido ipromes. Rarirya sinan sinan berower ma befawi Suri fandun bedya faro wos Byak ine nsya siryab fafaya ba. Sikofn kasumasa be au ma Mansren Allah bye barakas rum bedya besiper. Kako faro swa, inai, roma be sya, ma fararur bena. Mansren nanggi ryo us o mgo ro ras ma rob. Tabea nabor be mgo ro sup Inggris Oxford. Fasfas ine byebe fas ro ras Sabtu ras ebe samfur eser sesr di fik ro paik April taun syaran di suru sesr ebe samfur oser ro Mandiri sup Byaki bar Wamires. Befas ya Bernece Mofu.