Fafyar bero mandira murbab faro kapirare Mawa. Aruken ma Manggabras. Ras ya nido Arukeni o Manggabras suranda suyobe suraswan. Ras anya dares ya isam kaku inja sumbrowe. Ro diya suyobe surande surir srai bekamur no fa suyinem. Surande ro yen andir anya kwar ido. Suyerkak wai subors ani. Ramnai ido, sumbran rande suyors ro srai fuar anya bo suwakwakr be srai bidwom ani wa ryas e. Insape sukur pampum mansei beyek srai knam anya ni. Mura ido manggabras i beyeki. Dek ra ryas e, ryir srai bon annane rarbab kwar. Indo aruken rya fa dun na ma kyon dan pres na ra nabro. Imbo srai bon di suru sui bedawr sui. Imbarya, manggabras dado rarbab ido aruken byerwas sraibon ansuya fa manggabras nya oser indo manggundi nya oser. Manggabras myam fama eroba rya, ifukn aruken i bo dobe, "Insanja srai yarir anna nabor besya boi nroro iso? Mura ido aruken dobe, "Insanja marano ryama yabob, marano ryama yabob rao nabro." Manggabras dawos babo byefasis monda. Inja suyan sraibon ansuya ramnai, sube sukaber randa suraswan wer. Imbesya boi, fakok bepai manjau ya nya kyabas. Mura ido manggabras iwan aruken i fa ifrar dandi dobe pyai fakok anya nido, dew pdef bo isapi rarbab fakok anya kyus kir sneri. Mura ido srai bebor insanja dan na na narbai pres ra nabor bo napyar naki. Mura ido manggabras imbrif i rao mgamor biesya siwai ra aukor biedi. Hi hi hi.. Fafyar ine byebe fas ro ras ari Minggu mandira tanggal 18 April 2010 ro Mandiri sup Byak bar wamires. Befas ya Bernece Mofu.