Yafar farfyar Sanadi yo mbo inai byedya. Byedya fa roro romawa ye
befarkor ro sup bondi ro Amerika iwa ine. Yaba ba ya ra o isof roro
yaba myae yabe tahun samfur di fik sesr ri wonem ine yakain ro mnu ine
Sabai. Inja yara be mob o ba ma insape yakaber ma yabe yafawar fawar
ine ba. Inja yafawar i rarisne. Ro mnu Saba iraine i. Korbeno benir be
Bakaka ya byarek royu nyan kwar u Saba Warwer siraine sedi. Nyan ya
snori Kinefni. Korben ine fyair bin berande ido bebaraprapen ro yaf
narewara bo bebur mumra si. Fyair simbran rao sisyob ido inai binkbor
anine dakuser ro ro yo snari suyakuser. Inai binkbor ya snonsnon byedi
Inggini. Sumbran mra korben anine ikanou bruri ma syun roro yu inawen
faru anya ma ikas fananjur ro i rao inawen in ani dun bo dadoi. Dadoi
rarbab i rya nda ro mnu irawa ido inawen fadu anya myarbak rya in anya
diber i ma ikofen snari. Inggini ikofen snari bo dobo, "Awin insanja
kumbran ro diwamra me inawen faru ine myarbak bokn radine ba. Imboi
ine myarsyur ja. Robaido kumampan ari. Sumam mufrum ido korben ani i
Bakaka i bekakas royo inawen faru anya dori. Inja korben anya byak
sbari ma dobo, "Mkun aya." Inja suyun i randa byarek ro rum
ani. Skenef kayam ro rum anya boi korben anine denef so yu in ani
Inggini bin Yomga ni. Suna ro sim ya iyi. Mboi srar b-y-ansuine
sufawiba. Kmari Sanadi yo ifawi ba. Binsar ani sifawi ba. Boi rob ido
korben anine i-so snonisi ra ryo ro bin anya fmar byedi. Rao rob ri
fumo skoyane srar b-y-ansui ryari o sumarisen manggun ba. Muraido
sukofen kmari bo suyobo, "Kamamo insape kobe kan in bo nari." Inja
skokon skofawar ido korben anya ryower. Byarek ro sim irumwa bo ryower
mu-ndi ro skofawar i. Inja ikofen Inggini bo dobo, "Snon bansui ri ya
kmami sibe san in ido na wakofen be si bo srande s-bak airares." Inja
skorower us u korben anine ikofen be u in anine Inggini. Irya nja
meser skorande skobak airars na. Skun mra skosu way mkun anya randa
korben ani iki rarbab ikas ro do. Bo subores kukr i randa skopap o
Samidares. Ido korben anya iyor ikofen fa skokob airars anna bo insape
darekepen bo iki bruri rarbab i isu roro yu karui na bab na. Isu
randum i in ansya s-nas bo sisae randi skawkuw ma skobuk aryes
na-sau. Skopap Samidares rao imnai skora frum skopap u Sawarap. Skonap
i wer ma skosawn in ansya raryas sbarek ro way anya dori. Boi bekanaek
ansuya sumarisen manggun o korben ani byuk o bin subani Inggini irya
ba. Muraido suna wosi. Suyobo fyor o iwai rarbab i darekepen airars na
bo isyun roro rof na bab wara bab na iso kumun i. Mboi suyun
mgani. Robarye sumin beba anya ikofeno kasun ya bo dobo wasusu be
diyafa sa yakaruk i ro yubsi. Barya ebe beba anya duf mgan anya myae
byuk karuko bukor ya ido ikpar rande nyir be Nusasri bepupes
iwa-r-pon. Faduya wer rya wer fre snonsnon byedya isya boi yabefnder
i. Ido fadu ya iya wer ido rya wer fre isya wer boi snonsnon byedya
yabefnder i. Ido bekar murpur ya nyir be kaduki. Bo bekar mura roro yo
purai anya nyir be yo Kwomsimbriri. Ro bepupes kaku ya babo ine ngor i
be Saunek. Do purai mgun barsa ya rya ryae byarek us o Wursam ro
Adurki. Muraido mnuk ansine siryur rao si bebekarui ma bekon roro yu
Saba Warwer banda ma bepampam aniwa. Komamfra kada bekain annara ya fa
korben ine mnuk byesya siri. A nja imnai ro dine.