Fafyar bero mandira ine minggu 28 Maret 2010 oras ri fyak ro mnu Ramdori, byair fawawi berama ro farkarkor ya fafisu daksun ro mun Warbyak bepon ro mnu Napdori taun syaran eser utin ri siw samfur ri fyak sesr ri fik 1947. Berak farkarkor inenya sinan Stefen Mofu ro jemaat Swaroman Ampombukor. Rarirya fafisu ine romawa farkor byedine ibe dakfafyar payamyum ma fawawi ebefandun ro farkor inenya be ko. YA1: Eknik o rwower epeno yafar o kpu kubani, Stefeni. Byesyamas bo kyain ro Napdori boi ifur rumfarkor mkun ya fa nkofarkor do. Yabeumur tuju taun bo yafarkor. Yafarkor ro i ro mulai tahun syaran eser utin ri siw samfur di fyak sesr di fik, 1947. Apus Stefen kyain ro Napdo fa byeguru. Fyarkor nko rao posa. HM: A byeguru baime, bo byemajelis bo karna ifawi iwasya ma ifawi fyas inja dobe fyarkor mgo fa insamaido mgakfawi mgowasya ma mgakfawi mgakfasfas. YA1: Yafar pdef, a byesyamas bo fyarkor nko rao yek kelas tiga ro Napdori, inja byekirim aya fa yafarkor ro Ampombukore. Yafarkor ro Ampombukor rao yaranda yaksun ro Korido. Yaksun ro VVS kurbei yafarkor kawan ba bo yabur. Nkofur masalah ya fa Karolis Marisan inko, guru Marisani, muraido Vankempen iwan inko fa nkobur. Apus fyarkor aya fa yawuf suling, yuf paduan suara, yabepalu ra isof ro fawawi Apus byuk be ayan na isof ro ras ine yaswarepen na. Yaswarepen na ra isof yaba myas yafarbuk rao yana roma ri siw. Indo yabejadi majelis jemaat, yabebendahara jemaat ro Ramdoi. Yabepinda bur Napdo ma yaro Ramdo ra isof ro ras kufafyar ine. Yabelahir do tahun syaran eser utin ri siw samfur ri fyak. Inja kira-kira na umur ayedya taun samfur ri fik kwar be bo. I yaswarepen apusu farkarkor byuk be ayanna. Roma ayesine kame semajelis jemaat kame. Berkato apusi byuk farbub aya ro randak ya, byuk bob usr ayanya roma yesine kame sakbe amber ba boi sro Mansern fararur byedya rao insape eba ya iso Yusaki, insape dakbe pegawai negeri ro taun aninefa. Kero ido na dakawose. Snonsnon kaku yedya iri Yohanes Aprombis. Yabebaptis ro gereja Swaroman Ampombukor. Umur ayedya, yabejadi ro paik epon Yanuari raseponya tanggal satu ya, Yanuari tanggal satu sembilan belas empat puluh. Yor fa sama Mansren nu kubanya byeberkat au ro diya sama bewark sup ine, farkor kawasa kubansine fa ras suiyama kwabr ma ro Sup Papua ido... HM: Sefnder awer wos Byak anine. YA1: Sefnder awer wos Byak anine. Irya yakofn faro kasun anauya ro diya bo yafafyar ma yamnai ro dine boi roma banine dakfafyar wer.