HM: Inja rasne ras Sabtu tanggal 17 April 2010. Nggokain do Sepse fa
nggofafyare. Nja fawar ine ibe nggofawar fa samaido nggofarem i be sup
amber diyafri (Inggris). Ya inja bapa wakawose, wap snonsnon banya a
umur bedya. 
AA: Fafyar ine ro fyor nkawos baime yakofnbair
snori. Snori yo Abner Ansek, boi yabeumur 45 taun. Barye yafawaru
barburo nkobur ker Samares mumrei. Nkobur tahun 1971. Nkobur mre
nkobebuka yo mnu ya snoriso Yimdi. Nkobebuka i ramnai nkofur o
rumfarkor, nkofur o gereja boi nkobepake senk ba boi rum os na yo
nkofur na. 
HM: Mgofaryan besuru mre ro sup ya do ine nja dine ido
mgorak fararur rum bero dine na ro yo? 
AA: Nkobemulai yo nkofur rum na
ro dinerpon. Boi desa Renyani byuko senk ram sya myas boi sibor
ba. Mura ido mansar Yokanes ikofn bo dobo, "Senk sine sibor ba rye
mkobuk senk sinera siwai beyo rum na bar bande naiwande. Boi mkokur os
na ma nawai beyo bar bun ine mbune, sam mesru kobeundan o mansar
Renyani myas myam kabor dobo, "Ba rum ine bar ine ryarso? Indirio
byesenk pdef ba boi bari byeos bari byesenk. Mura ido nkofur
dariri. Desa ryamyae myam damnai ido sampe mansaro Yokanes ikofn bo
dobo, "Wakfawi Papua nkoya mob o nkokofn bo nkob o ro bena keri yo
bena ra bar iyafa nya, baru os ker ibena bar iyafa ni. Ro diya ido
desa Renyani sampe rum annane ryamyae myam na kwar mura ido sampe
byuko bandes ansya ma sampe nkofur o rum annaine ro Sepse rine. 
HM: Inja mgofur rum na ra nabro rumfarkor na mgofrur na wer ro dine ramnai
insape romawa sya sfarkor pyum ro dine ke? 
AA: Sampe nkofur o rum nane ra nabro romawa nsya sfarkor. Sfarkor do
dine rao, sampak no nsubr da dine baime. Baritoi dun ai ro sup ine
sape doseri ifur sampak nane ma napyum ma sape mobil naibab yafa
nafrar mu ra mu ma mu ra mu ma ro i. Randak ya me dine be Sundei
kopbab siyafes kobark koryarn kaku. Besyabo abe nkona rumfarkor bero
dibunnena nje nkorarbab nkuno batu tela, semen, senk, kawat, sepulu
sepulu, balok lima sepulu, nkobyaun do Sundei mumyase. Sino sirya kada
na sakbyaun do Sundei myae ro dine ba. Me fafisu kermgun iyafa rya
kosambrab rariso kobar do Sundei myae ker dinendi. Be kakna
rumfarkoro, gereja ido kobemau rye, mau nkobena nairi, nkobemau rao
isof ro rumfarkor, gereja nai beyobr nainera kame. Skaran nkofrur mnu
ninera ipyum kwar ido SMP ya i beyobr irei, ma romawansi sra be
Bosniki wer ba boi si befarkor sirei.
HM: Inja fafyar ebebair mnu Sepse fafisu sbaus i ro sup ya dori ro Sup
Byaki mun oridek ine. Befafyar ya sinan Apner Ansek. Berama beyunu
fafyar inenya sinan Henoch Mofu.