Ras ine ras Senen ras bebe samfur seser di kyor ro paik September
tahun syaran di suru sesr di fyak oras bebe war arwo babo. Fafyar ine
yamarisen yafafyar i faro kpu mgun ayesuya Hannah ma Sastra Mofu suro
sup bondi sup Enggeres. Fafyar ine ryok radine: ras ya ido snon ri
kyor skobe skoranda skora-swan. Snon anskoine bena rawen ya bruri
byor, boi benarem ya byemnore ma befara ya byebabara. Ras anya dares
ya iba kaku roba ido iba namsimba. Inja ro fyoru skobores baime bena
rawen anya kyoryae benaremi bo dobe, "naeko ras ine dares ya iba kaku
nja komindi byemnoro ipok fa isnofu mnor byena baberi." Inja bebemnor
anine dakkoryae befara anine bo dobe, "naeko rasine dares ya iba kaku
nja komindi imakero ipok fa isnau i baberi." Ikofen faro yo bebe
babara ani. Inja bebe babara anine dakkoryae roba ido dobo dakfafirku
bena rawen anine bo dobe, "naeko rasine dares ya iba kaku yo komindi
ipok fa ryub u bruri baberi". Ikofen fa roro bena rawen anine. Inja
ras anine dares ya iba kaku roba ido iba fafayaba. Imbape snon
anskoine skofarmgu monda. Infama bebemnor anine fyarmgu ma ipok ba
kwar. Inja syewar nyan fa byuk i frous o roba ido byuk be anggaro naek
b-y-ansuine. Radine dobe, "naeko muyakmam munde kada randip ya iso
beoresu beyanan roro yen andir irewani. Yana sinapano kada nari yapami
radine." Inja ikofen bo isnof fasausau mnor b-y-annane. Inja bebe
bebyor anine daksewaru nyan wer Dakkofen bo dobe, "naeko pam i rirya
kada nari ayaiso besonu dur o ma yabuk i kundur i radine." Inja
dakkofen boi ryub u fasausau masen ken na ma byuk i ryub u bruri mob
bebyori. Inja bebe babara anine roba ido befara anine daksewar nyan
wer. Dobe, "naeko wakun dur rirya kada ayaiso nari besau bur byesya
radine." Inja ikofen bo isnau fasau-sauo baken b-y-anine roba ido
isnau fasausau babara b-y-ansine. Inja ras anya snonanskoine skokoryae
manggun sko bo skombrifra. Irya kwar fafyar mgun ro kpu mubedya insar
Mofui ro Manuren Nyampun Kwaidi Biak Timur. Imboi yamarisenu yadisen
doya ri kyor fa yafarem be Hannah yo Sastra mu. Doya skoya skorok
radine.